Blog

பாகிஸ்தானில் அமைந்துள்ள பெஷாவர் நகர் பாடசாலை மாணவர்கள் மீது தீவிரவாதிகளால் மேற்கொள்ளப்பட்ட மனிதாபிமானமற்ற தாக்குதலை அகில இலங்கை ஜம்இய்யத்துல் உலமா மிக வன்மையாகக் கண்டிக்கின்றது. இஸ்லாம் அமைதியையும் சமாதானத்தையும் ஒற்றுமையையும் சகவாழ்வையும் வலியுறுத்தும் ஒரு மார்க்கமாகும். அதேபோன்று அன்பு, பாசம், விட்டுக் கொடுப்பு, சகிப்புத்தன்மை போன்ற உயரிய பண்பாடுகளைப் போதிக்கும் மார்க்கமாக இஸ்லாம் காணப்படுகிறது. இறுதித் தூதர் நபி ஸல்லல்லாஹு அலைஹிவஸல்லம் அவர்கள் ‘இரக்கம் காட்டக்கூடியவர்களுக்கு அல்லாஹ் இரக்கம் காட்டுகிறான். பூமியிலுள்ளவர்கள் மீது இரக்கம் காட்டுங்கள் வானில் உள்ளவன் உங்கள் மீது இரக்கம் காட்டுவான்’ எனக் கூறியுள்ளார்கள். – திர்மிதி.

ஒரு முறை ஒரு கிராமப்புற அரபி, நபி ஸல்லல்லாஹு அலைஹிவஸல்லம் அவர்களிடம் ‘நீங்கள் உங்களது குழந்தைகளை முத்தமிடுகின்றீர்களா? நாம் அவ்வாறு முத்தமிடுவதில்லை என்று கூறிய போது, நபி ஸல்லல்லாஹு அலைஹிவஸல்லம் அவர்கள் அவரைக் கண்டித்த சம்பவம் புகாரியிலே பதிவாகியுள்ளது. இவ்வாறு அன்பையும் இரக்கத்தையும் போதிக்கும் மார்க்கமான இஸ்லாத்தின் பெயரால், இஸ்லாத்தின் ஜிஹாத் என்ற கோட்பாட்டைப் பிழையாக புரிந்து கொண்ட சிலர்; செய்யக்கூடிய இவ்வாறான மிலேச்சத்தனமான செயற்பாடுகளை ஒருபோதும் இஸ்லாம் அங்கீகரிக்கவில்லை.

132 சிறார்கள் மற்றும் 09 பணியாளர்கள் உட்பட 141 பேர் மரணித்துள்ள இந்த தாக்குதலை, அகில இலங்கை ஜம்இய்யத்துல் உலமாவும் இந்நாட்டு முஸ்லிம்களும் வன்மையாகக் கண்டிக்கின்றனர். மேலும், இதில் பாதிக்கப்பட்டவர்களுக்கும், பாகிஸ்தான் நாட்டிற்கும் அகில இலங்கை ஜம்இய்யத்துல் உலமா தனது அனுதாபத்தைத் தெரிவித்துக் கொள்கிறது. இவ்வாறான மனிதாபிமானமற்ற, தீவிரவாத செயற்பாடுகள் முற்றாக இல்லாமல் போகவும் இவற்றிற்கு பின்னால் உள்ள, இஸ்லாத்திற்கு அபகீர்த்தி ஏற்படுத்த நினைக்கும் சூத்திரதாரிகளின் திட்டங்கள் செயலிழக்கவும் முஸ்லிம்கள் அனைவரும் அல்லாஹ்விடம் பிரார்த்திக்க வேண்டுமென அகில இலங்கை ஜம்இய்யத்துல் உலமா அன்பாக கேட்டுக்கொள்கிறது.


அஷ்-ஷைக் எம்.எம். அஹ்மத் முபாறக்
பொதுச் செயலாளர்
அகில இலங்கை ஜம்இய்யத்துல் உலமா
More >>http://www.acju.lk/ta/press-release-ta/school_pakistan_attack/